प्रहरीको अनुरोध बमोजिम रविलाई छ दिन थुनामा राख्न अनुमती

पोखरा - प्रहरीले अनुमती मागे अनुसार नै जिल्ला अदालतले सहकारी ठगी प्रकरणमा हिरासतमा रहेको रास्वपा सभापति एवम् पुर्व गृहमन्त्री रवि लामिछानेलाई छ दिनसम्म हिरासतमा राख्न अनुमती दिएको छ । जिल्ला अदालत कास्कीका न्यायाधीश नवराज दाहालको इजलासले लामिछानेलाई ६ दिन हिरासतमा राख्न प्रहरीलाई अनुमति दिएको हो ।

जिल्ला अदालत कास्कीका सूचना अधिकारी सुरज अधिकारीका अनुसार २ गतेदेखि लागू हुने गरेर ६ दिन हिरासतमा राख्ने अनुमति दिएको छ । रविको तर्फबाट वरिष्ठ अधिवक्ता सुशील पन्त,  डा. नारायण घिमिरेले रविलाई हिरासतमा राख्न नपर्ने बहस गरेका थिए । सहकारी पीडितका तर्फबाट जिल्ला सरकारी वकिल कमला काफ्ले, सहन्यायाधिवक्ता तिवारी, शान्ति शर्मा, अधिवक्ताहरू युवराज पराजुली र बिबि बिष्टले बहस गरेका थिए ।

संसदीय छानविन विशेष समितिको प्रतिवेदनले गोरखा मिडिया नेटवर्कका सञ्चालकको पनि सहकारीको रकम दुरुपयोगमा संलग्न रहेको ठहर गरेको छ । गोरखा मिडियाका सञ्चालकमध्येका एक पूर्व डीआईजी छविलाल असोज ६ गते काठमाडौंबाट पक्राउ परेका थिए । पूर्व गृहमन्त्री रवि लामिछाने प्रबन्ध निर्देशक रहेको गोरखा मिडिया नेटवर्कमा पाँच वटा सहकारीबाट ६५ करोड ५४ लाख रुपैयाँ अपचलन भएको सहकारी छानबिन समितिले प्रतिवेदनमा उल्लेख गरेको छ । सरकारले प्रतिवेदन कार्यन्वयनका लागि प्रहरीलाई निर्देशन दिएको छ ।

सहकारीका अध्यक्षसमेत रहेका फरार जीबि राई , रवि लामिाछाने, छविलाल जोशी र कुमार रम्तेल गोरखा मिडिया नेटवर्कका साझेदार हुन। कुमार रम्तेल सहकारीको कोषाध्यक्ष हुन् । उनलाई प्रहरीले गएको वर्ष भदौ २५ गते काठमाडौंबाट पक्राउ गरेको थियो। अहिले पुर्पक्षका लागि कास्की कारागारमा थुनामा छन् ।